မထင်မှတ်စရာ သေမထူး၊နေမထူး ဘ၀များ
ဘ၀ရှင်သန်မှုတွေ လုံလောက်တဲ့အကြောင်းအရင်းနဲ့ တွန်းအားကိုပေးနိုင်တာက ဘုရားပဲ ဖြစ်ပါတယ်။ အောင်မြင်မှု၊ ကြွယ်၀မှု၊ ကျော်ကြားမှုနဲ့ ဆုတံဆိပ်တွေကမပေးစွမ်းနိုင်တဲ့ ကျေနပ်မှု၊ အဓိပ္ပာယ်ရှိမှုနဲ့ တန်ဖိုးရှိမှုတွေကို ယေရှုဘုရား ပေးစွမ်းနိုင်ပါတယ်။ ဘ၀မှာ ဘယ်သူကမှ မပေးနိုင်တဲ့၊ ဘယ်လိုနေရာကမှ မရနိုင်တဲ့ ရှင်သန်ရခြင်းအကြောင်းအရင်းနဲ့ ရှင်သန်ဖို့ ထက်သန်စိတ်ကို ယေရှုဘုရားဆီမှာ ရှာဖွေတွေ့ရှိနိုင်ပါတယ်။
သေမထူး၊နေမထူးဘ၀လို့ ပြောလိုက်ရင် လူအများစုရဲ့အတွေးမှာ ဆင်းရဲကျပ်တည်းလွန်းသူ၊ ကြီးမားတဲ့ဆုံးရှုံးမှုတွေ ကြုံတွေ့ရသူ၊ အထီးကျန်သူ၊ ချို့တဲ့မှုကြီးမားလွန်းသူတွေသာ အများအားဖြင့် ပေါ်လာလေ့ရှိပါတယ်။ အောင်မြင်သူတွေ၊ ကြွယ်၀ချမ်းသာသူတွေ၊ အထင်ကြီးအားကျရလောက်တဲ့ ထင်ရှားကျော်ကြားသူတွေဟာ သေမထူး၊နေမထူး ခံစားချက် မျိုး မရှိနိုင်ဘူးလို့ သင်ထင်နေရင် မှားပါတယ်။ ဥပမာ - 𝐑𝐨𝐛𝐢𝐧 𝐖𝐢𝐥𝐥𝐢𝐚𝐦𝐬 ဆိုတဲ့ ကမ္ဘာကျော်ဟောလိ၀ုဒ်မင်းသားကြီးကို ကြည့်ပါ။ သူဟာ အော်စကာဆု၊ ဂရမ်မီဆုတွေ၊ ရွှေကမ္ဘာလုံးဆုတွေအပါအဝင် ရုပ်ရှင်ထူးချွန်ဆုပေါင်းများစွာ ရရှိထားတဲ့ ကျော်ကြားတဲ့ ဟာသမင်းသားကြီးဖြစ်ပါတယ်။ သူ့ဇာတ်ကားတွေကိုကြည့်ရင် လူတွေ ပြုံးရ၊ ပျော်ရ၊ အမောပြေရလို့ ပရိတ်သတ်တွေရဲ့ ချစ်ခင်လေးစားမှုကိုလည်း ပိုင်ဆိုင်ရသူတစ်ယောက်ဖြစ်ပါတယ်။ ဒါပေမယ့် သူ့အသက် (၆၃)နှစ် အရွယ်၊ ၂၀၁၄ ခုနှစ်မှာ ကိုယ့်ကိုယ်ကိုယ် အဆုံးစီရင်သွားခဲ့ပါတယ်။ သူအဆုံးစီရင်သွားတဲ့သတင်းကိုကြားလိုက်ရတဲ့ ကမ္ဘာကြီးဟာ သူ့ပရိတ်သတ်တွေနဲ့အတူ တုန့်လှုပ်ခဲ့ရပါတယ်။ လူတွေကို ပြုံးပျော်စေလေ့ရှိတဲ့သူဟာ၊ ကိုယ့်ကိုယ်ကိုယ် အဆုံးစီရင်ရလောက်အောင် ဘယ်လောက်ထိ စိတ်ဖိစီးပင်ပန်းနေခဲ့တာလဲ၊ လူတွေ အထင်ကြီးအားကျရလောက်တဲ့ အောင်မြင်ကျော်ကြားသူတစ်ယောက်ဟာ ဘာအတွက်ကြောင့် ရှင်သန်ချင်စိတ်ကုန်ခမ်းသွားခဲ့ရတာလဲဆိုပြီး မေးစရာ တွေတသီကြီး ဖြစ်လာပါတယ်။
“လူသည် ရယ်စဥ်အခါပင် ဝမ်းနည်းသောစိတ်သဘောရှိ၏”လို့ သမ္မာကျမ်းစာက ဆိုပါတယ်။ လူမြင်သာတဲ့ အောင်မြင် ကျော်ကြားမှုနဲ့ ကြွယ်၀ချမ်းသာသူတွေမှာလည်း လူအများစု မမြင်နိုင်၊မသိနိုင်တဲ့ ကြေကွဲဝမ်းနည်းစရာတွေနဲ့ ဖိစီးပင်ပန်း စရာတွေရှိနေတတ်ကြောင်း ဖော်ပြလိုခြင်း ဖြစ်ပါတယ်။
တကယ်တော့ ဘ၀ရှင်သန်မှုကို အဓိပ္ပာယ်ရှိစေတာက လူအများစုထင်မှတ်နေကြသလို ချောမောလှပမှု၊ အောင်မြင် ကျော်ကြားမှု၊ လူသိများထင်ရှားမှု၊ ကြွယ်၀ချမ်းသာမှုတွေ၊ ဆုတံဆိပ်တွေ၊ လူတွေရဲ့ အသိအမှတ်ပြုမှုတွေဟာ ဘ၀ကို အဓိပ္ပာယ်ရှိရှိ ရှင်သန်နိုင်ဖို့အတွက် လုံလောက်တဲ့တွန်းအားတွေ မဟုတ်ကြပါဘူး။ အကယ်၍ ဒီအရာတွေကသာ ဘ၀ကို အဓိပ္ပာယ်ရှိစေတာမှန်ရင် 𝐑𝐨𝐛𝐢𝐧 𝐖𝐢𝐥𝐥𝐢𝐚𝐦𝐬 လိုလူတွေဟာ ကိုယ့်ကိုယ်ကိုယ်အဆုံးစီရင်တဲ့အခြေအနေထိ ဖြစ်လာစရာ အကြောင်းမရှိပါဘူး။
ဘ၀ရှင်သန်မှုတွေ လုံလောက်တဲ့အကြောင်းအရင်းနဲ့ တွန်းအားကိုပေးနိုင်တာက ဘုရားပဲ ဖြစ်ပါတယ်။ အောင်မြင်မှု၊ ကြွယ်၀မှု၊ ကျော်ကြားမှုနဲ့ ဆုတံဆိပ်တွေကမပေးစွမ်းနိုင်တဲ့ ကျေနပ်မှု၊ အဓိပ္ပာယ်ရှိမှုနဲ့ တန်ဖိုးရှိမှုတွေကို ယေရှုဘုရား ပေးစွမ်းနိုင်ပါတယ်။ ဘ၀မှာ ဘယ်သူကမှ မပေးနိုင်တဲ့၊ ဘယ်လိုနေရာကမှ မရနိုင်တဲ့ ရှင်သန်ရခြင်းအကြောင်းအရင်းနဲ့ ရှင်သန်ဖို့ ထက်သန်စိတ်ကို ယေရှုဘုရားဆီမှာ ရှာဖွေတွေ့ရှိနိုင်ပါတယ်။
