ဂရမ်မီဆုနှစ်ခုပိုင်ရှင် အဆိုကျော် Tori Kelly ရဲ့ အောင်မြင်မှုလမ်းမပေါ်က သင်ခန်းစာ
သူ့ရဲ့ စိတ်ပျက်ရတဲ့အကြောင်းတွေ၊ စိတ်ရှုပ်ထွေးမှုတွေနဲ့ ခံစားချက်တွေကို သူ့ရဲ့ မှတ်စုစာအုပ်မှာ ရေးဖြစ်ခဲ့ တယ်။ ပြီးတော့ “ဘုရားသခင် ကျွန်မကို လမ်းပြပေးပါ၊ ကျွန်မ သီချင်းမဆိုရဘူး၊ သီချင်းဆိုတာ အလုပ်မဖြစ်ဘူးဆိုရင် ကျွန်မကဘာလဲ၊ ကျွန်မဘာဆက်လုပ်ရမလဲ”ဆိုပြီး ဆုတောင်းစာလေးကိုလည်း ရေးခဲ့သေးတယ်။
Tori Kelly ဟာ အမေရိကန်အဆိုတော်ဖြစ်ပြီး အောင်မြင်တဲ့တေးရေးတစ်ယောက်လည်း ဖြစ်ပါတယ်။ သူဟာ ဂရမ်မီ ဆုနှစ်ခုအပါအဝင် တခြားဂီတထူးချွန်ဆုတွေကိုလည်း ဆွတ်ခူးခဲ့ပြီး၊ ရုပ်ရှင်ဇာတ်ဝင်တေးတွေကိုလည်း ဆိုခဲ့ပါတယ်။ အောင်မြင်တဲ့ Animation ရုပ်ရှင်တစ်ခုဖြစ်တဲ့ Sing ဆိုတဲ့ဇာတ်ကားမှာလည်း ဆင်မလေး Meena နေရာကနေ အသံ သရုပ်ဆောင်ခဲ့သူဖြစ်ပါတယ်။
Tori Kelly ဟာ ဂီတပိုးရှိတဲ့ မိဘနှစ်ပါးကနေ မွေးဖွားလာခဲ့တာကြောင့် ငယ်ငယ်ကတည်းက အဆိုပိုင်းမှာ ပါရမီရှိတယ် လို့ ဆိုနိုင်တယ်။ သူ့အသက် (၁၀)နှစ်မှာ ‘Star Search’ ဆိုတဲ့ TV ရုပ်သံအဆိုပြိုင်ပွဲမှာ ဝင်ပြိုင်ခဲ့ပြီး၊ အသက် (၁၂)နှစ် အရွယ်မှာ America’s Most Talented Kids ဆိုတဲ့အစီအစဉ်မှာလည်း ဝင်ရောက်ယှဉ်ပြိုင်ခဲ့ပါတယ်။ သူ့အသံကို ကြား ရသူတိုင်းက ‘အံ့ဩစရာအသံပိုင်ရှင်လေး’ဆိုပြီး ချီးကျူးလေ့ရှိပြီး၊ သူ့ကိုယ်သူလည်း ‘အောင်မြင်မှုဟာ သူ့အတွက်ပဲ’ လို့ ယုံကြည်နေခဲ့တာပေါ့။
ဒါပေမယ့် ဒီယုံကြည်ချက်တွေဟာ သူ့အသက်(၁၂)နှစ်အရွယ်၊ တေးထုတ်လုပ်သူတစ်ဦးနဲ့ စာချုပ်ချုပ်ဖို့ ဆွေးနွေးချိန် ကစပြီး ပျက်ပြယ်သွားခဲ့ပါတယ်။ တေးထုတ်လုပ်သူတွေ တစ်ယောက်ပြီးတစ်ယောက်နဲ့ စာချုပ်ချုပ်ဖို့ အကြိမ်ကြိမ် စကားပြောကြည့်ခဲ့ပေမယ့် လူတိုင်းက “မင်းက လိုသေးတယ်၊ အရှက်ကြီးတယ်၊ စကားမပြောတတ်ဘူး” ဆိုပြီး သူ့မှာ မရှိတဲ့ ‘တက်တက်ကြွကြွနဲ့ ရှေ့ထွက်တတ်တဲ့ ပုံစံမျိုး’ကိုပဲ လိုချင်ကြတယ်။ ဒီလိုအပြောခံရဖန် များလာတဲ့အခါမှာ ကိုယ့်ကိုယ်ကိုယ် သူများနဲ့ ကိုယ့်ကိုယ်ကိုယ် နှိုင်းယှဉ်ကြည့်တတ်လာပြီး စိတ်ဓာတ်ကျလာခဲ့တယ်။ American Idol (Season 9) မှာလည်း ဝင်ပြိုင်ခဲ့ပေမယ့်၊ တော်တော်လေး အဆင်ပြေခဲ့ပြီးမှ နောက်ဆုံးမှာ အိမ်ပြန်ပို့ခံလိုက်ရတယ်။
သူ့အတွက် အခွင့်အလမ်းတံခါးတွေ တစ်ချပ်ပြီးတစ်ချပ် ပိတ်သွားသလို ခံစားရပြီး၊ တော်တော်လေး စိတ်ပျက်သွားခဲ့ တယ်။ သူ့ရဲ့ စိတ်ပျက်ရတဲ့အကြောင်းတွေ၊ စိတ်ရှုပ်ထွေးမှုတွေနဲ့ ခံစားချက်တွေကို သူ့ရဲ့ မှတ်စုစာအုပ်မှာ ရေးဖြစ်ခဲ့ တယ်။ ပြီးတော့ “ဘုရားသခင် ကျွန်မကို လမ်းပြပေးပါ၊ ကျွန်မ သီချင်းမဆိုရဘူး၊ သီချင်းဆိုတာ အလုပ်မဖြစ်ဘူးဆိုရင် ကျွန်မကဘာလဲ၊ ကျွန်မဘာဆက်လုပ်ရမလဲ”ဆိုပြီး ဆုတောင်းစာလေးကိုလည်း ရေးခဲ့သေးတယ်။
“ငါ့ပုံစံက အရှက်အကြောက်ကြီးပြီး၊ လူတွေကြိုက်တတ်တဲ့ တက်တက်ကြွကြွနဲ့ လန်းတဲ့ပုံစံမျိုး မဟုတ်ဘူး၊ ရုပ်လည်း မလှဘူး၊ ငါ့ရဲ့ ပင်ကိုယ်သဘာဝကိုက ငြီးငွေ့စရာပုံပေါက်နေတယ်”ဆိုပြီး သူတချိန်လုံး ခံစားခဲ့ရတယ်။ နောက်တော့ “ဒါတွေဟာ အလိမ်အညာတွေပဲ။ အမှန်တရား မဟုတ်ပါဘူး။ ငါက ရည်ရွယ်ချက်ရှိရှိနဲ့ ဘုရားရဲ့ စိတ်တိုင်းကျ ဖန်ဆင်း ထားတဲ့ လက်ရာဖြစ်တယ်”ဆိုပြီး ကိုယ့်ကိုယ်ကိုယ်လက်ခံလာတဲ့အခါ သူ့ကိုယ်သူ သူများနဲ့ နှိုင်းယှဉ်နေတာတွေ မလုပ် တော့ဘူး။
ဒီနောက်မှာတော့ သူ့ရဲ့ ဖြစ်တည်မှုအတိုင်း ရှင်သန်လာပြီး၊ သူ့ခံစားချက်တွေကို သံစဉ်တေးသွားတွေအဖြစ် ပြောင်းလဲ လိုက်တယ်။ “အရင်ကတော့ ကျွန်မဘာပြောရမလဲဆိုတာကို ဘေးလူတွေက သတ်မှတ်ပေးခဲ့ကြတယ်၊ ဒီတစ်ခါတော့ မတူတော့ဘူး၊ ကျွန်မကိုယ်တိုင် ကိုယ်ပြောချင်တဲ့စကား၊ ကိုယ်ပေးချင်တဲ့ message ကို ကိုယ်တိုင်ပြောတော့မယ်” ဆိုပြီး ဂစ်တာကို ကောက်ကိုင်လိုက်ပြီး ကိုယ်ပိုင်သံစဉ်တေးတွေ ရေးစပ်သီဆိုခဲ့တယ်။ ကိုယ့်ရဲ့ ဖြစ်တည်မှုကိုလည်း အရှိအတိုင်း လက်ခံလိုက်နိုင်ပြီဖြစ်တာကြောင့် ဘုရားသခင်ကိုလည်း ဒီလိုပြောခဲ့ တယ်။ “ဘုရားသခင်၊ ကိုယ်တော့်မှာ သမီးဘဝအတွက် ရည်ရွယ်ချက်ရှိတယ်ဆိုတာ သမီးသိတယ်။ ဘုရားသခင်ရဲ့ အစီအစဉ်ကို သမီးယုံကြည်တယ်။ သမီး နာမည်ကြီးပြီး ကျော်ကြားတဲ့သူမဖြစ်ရင်လည်း ကိစ္စမရှိဘူး။ အရာအားလုံးကို ကိုယ်တော့်လက်ထဲမှာ အပ်နှံပါတယ်” လို့ ဆုတောင်းခဲ့တယ်။
ဒီလိုစိတ်ပိုင်းဖြတ်ပြီး ဘ၀ကို ဘုရားလက်ထဲ ယုံယုံကြည်ကြည်ပုံအပ်ခဲ့ချိန်ကစလို့ အခွင့်အလမ်းတံခါးတွေ တစ်ခုပြီး တစ်ခု ပွင့်လာခဲ့ပါတယ်။ သူ့ရဲ့ ကိုယ်ပိုင်သံစဉ်သီချင်းတွေဟာ အွန်လိုင်းမှာ ပေါက်သွားခဲ့ပြီး၊ တေးထုတ်လုပ်သူတွေက လည်း သူ့ကို စီးရီးထုတ်ပေးပါရစေဆိုပြီး ကမ်းလှမ်းလာကြတယ်။ နောက်တော့ TVရုပ်သံအစီအစဉ်တွေ၊ အဆိုခရီးစဉ် Tour တွေတစ်ခုပြီးတစ်ခု ဖြစ်လာခဲ့ပြီး၊ ဂရမ်မီဆုတွေကိုလည်း ဆွတ်ခူးရရှိခဲ့တယ်။ Sing ဆိုတဲ့ကာတွန်းကားလေးမှာ ဆင်မလေး Meena နေရာကနေလည်း ပါဝင်သရုပ်ဆောင်ခွင့်ရခဲ့တယ်။ ဒီလိုနဲ့ သူ့ရဲ့ စိတ်ကူးအိပ်မက်တွေ တစ်ခုပြီး တစ်ခု ပြည့်စုံလာခဲ့တယ်။
Tori Kelly က ပြောဖူးတယ်။ “ကိုယ့်ဘ၀ကိုပြည့်ကြည့်ပြီး ကျွန်မနားလည်လာတဲ့အရာတစ်ခုရှိတယ်။ ‘အခု ငါ ကြိုးစား ပြီး ရှာဖွေရရှိထားတဲ့အရာတွေ မရှိတော့ရင်တောင်၊ ဘဝမှာ ယေရှုဘုရားရှိနေသေးရင် ငါ အဆင်ပြေနိုင်ဦးမလား’လို့ ကိုယ့်ကိုယ်ကိုယ် မေးခဲ့တယ်။ ကျွန်မကို ယေရှုဘုရား ပေးခဲ့တဲ့အရာတွေကို ပြန်စဉ်းစားလိုက်ရင် ဒီမေးခွန်းအတွက် ကျွန်မအဖြေက ‘အဆင်ပြေပါတယ်’ဆိုတဲ့အဖြေပါပဲ။ ကျွန်မ အဆင်ပြေတယ်၊ ဘာလို့လဲဆိုတော့ သူက ကျွန်မအတွက် အရာရာ ဖြစ်ပါတယ်။ ယေရှုဘုရားကြောင့်၊ ကျွန်မဟာ သူများပြောသလို အသက်ရှင်ဖို့ မလိုတော့တဲ့အပြင်၊ ယေရှု ဘုရားရဲ့ မေတ္တာ က ကျွန်မကို ဝန်းရံထားသေးတယ်”လို့ ဆိုခဲ့တယ်။
Tori Kelly ရဲ့ အဖြစ်က အောင်မြင်ဖို့အတွက် ဖိအားတွေရှိသလို၊ အောင်မြင်လို့ရလာတဲ့ ဖိအားတွေလည်း ရှိကြောင်း သတိပေးနေပါတယ်။ ဒါပေမယ့် ဘ၀မှာ ပတ်ဝန်းကျင်ကဖန်တီးတဲ့ ဘ၀ပုံရိပ်ထက်၊ ဘုရားရဲ့ အချစ်ကြောင့် ခံစားရ တဲ့ဘ၀ပုံရိပ်က ပိုပြီးချိုမြိန်အေးမြကြောင်း ဖော်ပြနေပါတယ်။ မိတ်ဆွေရော ဘယ်လိုထင်လဲ?
