ဒေါင်းလိုလူ ဖြစ်နေပြီလား
ဒေါင်းလိုလူတွေမှာ ခံယူချက်တစ်ခုရှိပါတယ်။ တစ်စုံတစ်ယောက်ရဲ့ အာရုံစိုက်မှုကိုရဖို့ (သို့ မဟုတ်) အသိုင်းအ၀ိုင်း တစ်ခုထဲဝင်ဆန့်နိုင်ဖို့ဆိုရင် ‘သုံးပြနိုင်ရမယ်၊ ဖြုံးပြနိုင်ရမယ်၊ လုပ်ပြနိုင်ရမယ်’ဆိုတဲ့ခံယူချက်ပဲ ဖြစ်ပါတယ်။ တဆက်တည်းမှာပဲ သုံးပြနိုင်သူ၊ ဖြုံးပြနိုင်သူ၊ လုပ်ပြနိုင်သူတွေကိုပဲ အထင်ကြီးတဲ့သဘာ၀လည်း အလိုလို ဖြစ်တည်လာပါတယ်။ ဒါပေမယ့် တကယ်တမ်း ဘ၀ရဲ့ စစ်မှန်အေးချမ်းမှုက အဲဒီလို အသိုင်းအ၀ိုင်းထဲမှာ မရှိဘူးဆိုတာကို နောက်မှ သိမြင်လာတတ်ကြပါတယ်။
ဒေါင်းတွေဟာ သူတို့ရဲ့ လှပတဲ့ရောင်စုံအမွှေးတွေကို ဖြန့်ကားပြီး၊ သူတို့ရဲ့ အဖော်ကိုဆွဲဆောင်လေ့ရှိပါတယ်။ ဒါကို အစွဲပြုပြီး အခြားသူတွေရဲ့ စိတ်ဝင်စားမှု၊ အာရုံစိုက်မှုနဲ့ အထင်ကြီးလေးစားမှုရအောင်ဆိုပြီး တစ်ခုခုလုပ်ပြလေ့ရှိသူ ကို ဒေါင်းလိုလူ (သို့မဟုတ်) Peacock Syndrome ရှိသူလို့ ခေါ်ကြပါတယ်။ အနောက်နိုင်ငံတွေမှာတော့ ပြိုင်ကား တွေမောင်း၊ ပြိုးပြိုးပျက်ပျက်တွေဝတ်၊ ငွေကို ရေလိုသုံးပြီး ကောင်မလေးတွေရဲ့ အထင်ကြီးမှုရအောင် လုပ်လေ့ရှိ သူကို ဒေါင်းလိုလူလို့ ခေါ်လေ့ရှိကြပါတယ်။ တကယ်တော့ ဒေါင်းလိုလူလို့ပြောတဲ့အခါ၊ အဲသလို ဆန့်ကျင်ဘက်လိင် ရဲ့ အာရုံစိုက်မှုကိုရှာနေသူတွေကိုပဲ ဆိုလိုတာမဟုတ်ပါဘူး။ ကိုယ်မျှော်လင့်တဲ့လူနဲ့ နီးစပ်ခွင့်ရဖို့၊ ကိုယ်ဝင်ဆန့်ချင်တဲ့ အသိုင်းအ၀ိုင်းထဲ ခြေချခွင့်ရဖို့ မရမကကြိုးစားလုပ်ပြနေသူတွေကိုလည်း ဒေါင်းလိုလူလို့ ခေါ်နိုင်ပါတယ်။
ဒေါင်းလိုလူတွေမှာ ခံယူချက်တစ်ခုရှိပါတယ်။ တစ်စုံတစ်ယောက်ရဲ့ အာရုံစိုက်မှုကိုရဖို့ (သို့ မဟုတ်) အသိုင်းအ၀ိုင်း တစ်ခုထဲဝင်ဆန့်နိုင်ဖို့ဆိုရင် ‘သုံးပြနိုင်ရမယ်၊ ဖြုံးပြနိုင်ရမယ်၊ လုပ်ပြနိုင်ရမယ်’ဆိုတဲ့ခံယူချက်ပဲ ဖြစ်ပါတယ်။ တဆက်တည်းမှာပဲ သုံးပြနိုင်သူ၊ ဖြုံးပြနိုင်သူ၊ လုပ်ပြနိုင်သူတွေကိုပဲ အထင်ကြီးတဲ့သဘာ၀လည်း အလိုလို ဖြစ်တည်လာပါတယ်။ ဒါပေမယ့် တကယ်တမ်း ဘ၀ရဲ့ စစ်မှန်အေးချမ်းမှုက အဲဒီလို အသိုင်းအ၀ိုင်းထဲမှာ မရှိဘူးဆိုတာကို နောက်မှ သိမြင်လာတတ်ကြပါတယ်။
ဥပမာ - ကမ္ဘာကျော်ရုပ်ရှင်မင်းသမီးကြီးမယ်ရီလင်မွန်ရိုးကိုကြည့်ပါ။ သူဟာ ၁၉၅၀-၆၀ နှစ်တွေမှာ ချောမောလှပပြီး ဆွဲဆောင်မှုအရှိဆုံး ဟောလိ၀ုဒ်ကြယ်ပွင့်ဖြစ်ခဲ့ပါတယ်။ ယောကျာ်းလေးတိုင်းက သူ့ကိုလိုချင်ကြပြီး၊ မိန်းကလေး တိုင်းက သူ့လိုဖြစ်ချင်ကြတဲ့ အားကျစရာဘ၀ကို ပိုင်ဆိုင်ခဲ့သူပါ။ ကနေဒီ ညီအစ်ကိုနဲ့တောင် အချစ်ဇာတ်လမ်းတွေ ရှိခဲ့တယ်လို့ ဆိုပါတယ်။ သူ့ဘ၀အစက Norma Jeane Baker အနေနဲ့ ဘ၀ကို ခက်ခက်ခဲခဲအစပြုခဲ့တာပါ။ သူ့အဖေ ကို သူတခါမှမမြင်ခဲ့ဖူးသလို၊ သူ့အမေဟာလည်း စိတ်ရောဂါပြဿနာတွေနဲ့ အမြဲလုံးပန်းနေရသူပါ။ သူဟာ တအိမ်ပြီး တအိမ်လှည့်ပြောင်းနေထိုင်ခဲ့ရတဲ့မိဘမဲ့ဖြစ်ခဲ့ရပြီး ကာကွယ်ပေးမယ့်သူလည်း မရှိခဲ့ပါဘူး။ ဆယ်ကျော်သက်အရွယ် မှာ ရုပ်ရှင်ကြည့်ရင်း လူတကာချစ်ပြီး အားကျရတဲ့မင်းသမီးဘ၀ကို တမ်းတလိုချင်ခဲ့ပါတယ်။ ဒါပေမယ့် သူတကယ် လိုချင်တဲ့ဘ၀ကိုရောက်ခဲ့တဲ့အခါမှာ သူစိတ်ပျက်ကြီး စိတ်ပျက်ခဲ့ရပါတယ်။ ဒါပေမယ့် သူ့ဘ၀ဟာ အချစ်ရေးနဲ့ အိမ်ထောင်ရေးပြဿနာတွေ၊ ခေါင်းပုံဖြတ်ခံရမှု၊ အလွဲသုံးစားလုပ်ခံရမှုနဲ့ မူးယစ်ဆေးသုံးစွဲမှုတွေကြောင့် ဆိုးရွား ပျက်ဆီးခဲ့ရတယ်။ အသက်(၁၆)နှစ်မှာ ပထမဆုံး အိမ်ထောင်ကျတယ်။ ၄ နှစ်အကြာမှာ ကွဲသွားတယ်။ အသက် (၂၈) နှစ်မှာ ဒုတိယအိမ်ထောင် ပြန်တည်ခဲ့တယ်။ (၉)လပဲကြာခဲ့တယ်။ အသက်(၃၀)မှာ တတိယအိမ်ထောင်ပြုခဲ့ပြန်တယ်။ (၅)နှစ်ကြာပြီးနောက်မှာ ကွဲသွားတယ်။ အသက်(၃၆)နှစ်မှာ မူးယစ်ဆေးအသုံးလွန်ပြီး သေဆုံးသွားခဲ့တယ်။
လူတွေရဲ့ အသိအမှတ်ပြုခံရဖို့၊ လူဝင်ဆန့်နိုင်ဖို့ကိုပဲ အခြားသူတွေရဲ့ တန်ဖိုးထားမှုအပေါ် အခြေခံပြီး ကိုယ့်ဘ၀ရဲ့ တန်ဖိုးကို စျေးဖြတ်သတ်မှတ်နေသူတိုင်းကို မွန်ရိုးရဲ့ဘ၀က ပြန်သတိပေးနေပါတယ်။ တကယ်တော့ သင်ဟာ သူများ တန်ဖိုးထားလို့ တန်ဖိုးရှိတာမဟုတ်သလို၊ သူများအလေးမထားလို့လည်း တန်ဖိုးမဲ့မသွားပါဘူး။ သင်ဟာ သင့်ရဲ့ ထူးခြားတဲ့ဖြစ်တည်မှုနဲ့အတူ တန်ဖိုးရှိပြီးသားသူ ဖြစ်ပါတယ်။ သင့်ကို ထူးခြားစွာဖန်ဆင်းထားပြီး၊ တန်ဖိုးထားမြတ်နိုး တဲ့ဘုရားရှိခြင်းကြောင့် သင်ဟာ အဖိုးအနဂ္ဂထိုက်တဲ့သူဖြစ်ပါတယ်။ သားသမီးတွေဟာ မိဘတိုင်းအတွက် ဘာနဲ့မှ လဲလို့မရလောက်အောင် တန်ဖိုးရှိကြသလို၊ သင်ဟာလည်း ဘုရားရှေ့မှာ ဘာနဲ့မှ နှိုင်းမရလောက်အောင် တန်ဖိုးကြီး တဲ့သူ ဖြစ်ပါတယ်။ လူရာဝင်ဖို့ ကြိုးစားနေမယ့်အစား၊ ဘုရားပေးတဲ့ သင့်ရဲ့ ဖြစ်တည်မှုကို လက်ခံပြီး၊ ဘုရားရဲ့ ချစ်ခြင်းမေတ္တာနဲ့ တန်ဖိုးထားမှုကို ခံယူရင်း၊ သင့်အတွက် ဘုရားစီစဉ်ပြင်ဆင်ထားတဲ့အနာဂတ်ကို အရယူနိုင်ဖို့ပဲ အာရုံစိုက်ကြည့်ပါ။
